سافر المجوس وراء نجم
نجم بيعلن ميلاد ملك عظيم
سافروا مسافة بالأميال
عشان بس يشوفوه
ولما وصلوا كان طبيعي يفكروا
إنه طالما ملك
يبقى نسأل على القصر الملكي
راحوا على أورشليم
ولكن المفاجأة
إنهم ملقوش ملك اتولد في أورشليم
ولا في قصر
ولا الملك الأرضي يعرف عنه حاجة
بالعكس دة خاف واضطرب
ومش هو لوحده
دة أورشليم كلها اضطربت معاه
وبدأ الملك الأرضي يخاف على عرشه
فطلب من الضيوف انهم يبحثوا بتدقيق
وفعلًا
كمل الضيوف مشوارهم ورا النجم
مش ورا عقولهم اللي اخدتهم للقصر
والنجم بقى زي مرشد ودليل
وكأنه ملاك بيرشدهم
وقف فوق مكان الصبي
في بيت لحم القرية الصغيرة
معقول في هنا قصر؟!!
لأ مفيش
طب يبقى أكيد أحسن بيت
لأ بردة
وقف النجم فوق بيت عادي
طب نخبط ونشوف
سلام …
احنا ضيوف جايبن نشوف المولود
لأ احنا معندناش مواليد
!!!
ايه دة؟!
يمكن تقصدوا الاتنين الضيوف
اللي دخلناهم الزريبة
الزريبة؟؟!
اه هتلاقوهم هناك
وهنا تخلىَّ المجوس عن فكرهم تمامًا
ودخلوا وشافوا الطفل
اللي سافروا عشانه أميال
وسجدوا له وقدموا هداياهم
الملك الحقيقي
ملك مختلف
بدأ مسيرته على الأرض
من تحت خالص
لأنه جاي بفكر جديد
وزي ما بدأ مسيرته من مزود بقر
قالها صريحة
"مملكتي ليست من هذا العالم"
أنا مش جاي أهدد عروش ملوك الأرض
أنا مش جاي أخد مكانهم
ولا قصورهم
ولا سلطتهم
كل دة أنا سايبه
ومش بس كدة
دة كل اللي هيتبعني
مش هيفرق معاه المُلك الأرضي
وفعلًا يارب
نلاقي كل اللي مشي وراك
كان مبدأه الترك
ياما ملوك خلعوا تيجانهم عشانك
وتركوا قصورهم
ياما أغنياء تركوا أموالهم وحقولهم
وياما ناس تركوا أهلهم
وحتى لو متركش بيت ولا أهل ولا مال
لكنه بيترك التنعم
بيترك الراحة عشانك
شكرًا يارب على الدرس الرائع
اللي أعطيته للبشرية
من اللحظة الأولى
أمك هي أفقر بنت
ملهاش حد خالص ولا ليها مكان
لكن هي فخر الجنس البشري
ومكان ميلادك
مزود البقر
بقى أعظم من أعظم قصر
فلنسبح مع الملائكة قائلين:
المجد لله في الأعالي
وعلى الأرض السلام
وبالناس المسرة
ميلاد مجيد
٧ يناير ٢٠٢٥م
تعليقات
إرسال تعليق